അണിയറക്കാരെപ്പോലും അദ്ഭുതപ്പെടുത്തുന്ന വേഗത്തിലാണ് ഒരു അഡാര്‍ ലൗ എന്ന ചിത്രത്തിലെ മാണിക്യമലരായ പൂവി എന്ന ഗാനം ഹിറ്റായത്. ആഗോളതലത്തില്‍ ഇത്രയും ഹിറ്റായ മറ്റൊരു മലയാള ഗാനമുണ്ടാകില്ല. ഇപ്പോള്‍ ഗാനത്തിന്റെ തെലുങ്ക് പതിപ്പ് ഇറങ്ങിയിരിക്കുകയാണ് ഇപ്പോള്‍. ചിത്രം തെലുങ്കിലേക്ക് മൊഴിമാറ്റിയപ്പോള്‍ ഗാനവും മാറ്റുകയായിരുന്നു.
കേരളത്തില്‍ നിന്നുയര്‍ന്നതുപോലെയുള്ള വിമര്‍ശനങ്ങള്‍ ഈ പാട്ടിന് തെലുങ്കിലില്ല. ഏറെ കയ്യടിയോടെയാണ് ഗാനത്തിന്റെ തെലുങ്ക് പതിപ്പ് ആസ്വാദകര്‍ സ്വീകരിക്കുന്നത്. മാണിക്യ മണികാന്തി പൂവെ എന്നു തുടങ്ങുന്ന ഗാനം ആലപിച്ചിരിക്കുന്നത് അനുദീപ് ആണ്. ചന്ദ്രബോസ് ആണ് വരികള്‍ മൊഴിമാറ്റം ചെയ്തിരിക്കുന്നത്. ഷാന്‍ റഹ്മാന്റെതു തന്നെയാണു സംഗീതം. വിനീത് ശ്രീനിവാസനാണു മലയാളത്തില്‍ ഗാനം ആലപിച്ചിരിക്കുന്നത്. പതിനൊന്നു ലക്ഷത്തോളം പേര്‍ ഇതിനോടകം ഗാനത്തിന്റെ തെലുങ്ക് പതിപ്പ് യൂട്യൂബില്‍ കണ്ടുകഴിഞ്ഞു.
മികച്ച പ്രതികരണം നേടി മുന്നേറുമ്പോഴും മലയാള ഗാനത്തിന്റെ ഭംഗിയില്ലെന്നാണ് ചിലരുടെ വിലയിരുത്തല്‍. ഗാനം വികലമാക്കി എന്ന വിമര്‍ശനവുമുണ്ട്. എന്നാല്‍ ഇതൊക്കെയാണെങ്കില്‍ പഴയപോലെ നിര്‍ദാക്ഷിണ്യമായ വിമര്‍ശനങ്ങള്‍ ഇപ്പോള്‍ ഇല്ല. അതേസമയം ഫ്രീക്ക് പെണ്ണേ എന്ന ഗാനം കൂടി തെലുങ്കില്‍ കേള്‍ക്കാന്‍ കാത്തിരിക്കുകയാണെന്നു കമന്റ് ചെയ്യുന്നവും ഉണ്ട്. ലൗവേഴ്‌സ് ഡേ എന്ന പേരിലാണ് തെലുങ്കില്‍ ചിത്രമെത്തുന്നത്. സുഖിഭവ സിനിമാസിന്റെ ബാനറില്‍ ഗുരുരാജയും സി.എച്ച് വിനോദ റെഡ്ഡിയും ചേര്‍ന്ന് നിര്‍മിക്കുന്ന ചിത്രം വലന്റൈന്‍സ് ദിനത്തില്‍ തീയറ്ററിലെത്തും.
